Bauer 60 suecht ... Arbet

S’Parlament wöt Überbrückigsleistige für älteri Arbetslosi. Konkret: Ab 60i bichömeds bis zur AHV en Batze, damit’s die 4, 5 Johr nöd under de Brugg müend überbrügge. Hauptsach weg gswypt vom Arbets-Tinder-Markt. Die Überbrückigsleistig tönt fascht echli noch ere Paliativ-Finanzhilf: «Chömmer nüt meh mache.»

Hey! Das Problem betrifft üs ali. In 30 Johr. Und denn wird me über üs denke: «Alti chönd zwor öpis, aber choschtet z’viel. Und sind langsam, nüme kompatibel, chli wie Windows. Second-Hand-Halt - waisch, abgnutzti Alt-Kleider-Säck». Aber wer het die Abnützigserschienige verursacht, hä? De Arbetgebendi. Danke! Und die Alte stönd plötzlich vormne neue Bruefsabschluss: De Bruef het mit ihne abgschlosse.

Debi hend die so viel z’büte. Sie hüeted gratis Dini Chind, wenn du am Schaffe bisch. Für en viel bessere Lohn. Zum die eignet AHV abzsichere.

S'Parlament het jo s’Problem nöd glöst, sondern bekämpft d’Symptom, immerhin öppis. Aso en Notgrosche für die Alte, aber nume wenn’s lang gschafft und kuum Geld uf de Siite hend. Aso wenn ich das jetzt scho weiss, chan ich au eifach afange üebe, arm z’si. Guet. Me nennt das au spare. Aso die einzig Möglichkeit zum spöter nöd arm si isch, so z’tue, als wär mes hüt scho. Me impft sich d’Armuet in ere chline Dosis als Prophylaxe.

Debi wär doch die besti Prophylaxe, wenn d’ Firmene gezielt ü50-ger rekrutiered, Teilziit abüüted, oder e «Senior-Lehrstell». Well Alti hend ein grosse Vorteil: Sie kenned d’Wünsch vo de Chund*inne am beste, well Ziilgruppe im gliche Alter isch. Als Heilpädagogin gsehn ich aber au no wiiteri Ressource: Alti chönd nöd nu Stenografie, s’Faxgrät bediene odr s’Schlussliecht si bim Firme-Usflug, sie chönd au no als letschti Spezies Telefonnummere uswendig. Die Junge sind zwor schneller, aber die Alte wüssed, wo dure.

Ich find’s no spannend, dass Politiker*inne uf söttigi Lösigsvorschläg chömed - vieli jo als Direktbetroffeni - afach mit Privilegie.

Aber hey, zum Glück het s’Parlament wenigstens d’Änderig im Betäubigsmittelgsetz agnoh. Jetzt chönd die ältere Betroffene immerhin a de Studie zum regulierte Cannabis-Konsum mitmache. Wenn d’Alternative so troschtlos sind, zieht me sich lieber die Lösig ine.

Well sus gits nur eis: D’PH mache mit 60gi; Lehrpersone brucht’s immer. Wobi, das wött würkli niemmer. Denn doch lieber arm und bekifft.